MACSU

Mae llawer mewn penbleth mewn pentre a thre,
A ellir gwneud cwrw mor hawdd â gwneud te,
Wel! gellir gyfeillion, os oes gennych lestri
Dyw tegell a thebot yn werth dim i facsu.
Hen erwn o bren yw’r pwysicaf o’r cyfan
A bwiler i’w ferwi, un nwy neu un trydan,
Rhaid sgwrio y gerwn (neu faril i rai)
Pwysigrwydd y cyfan, sy gyda’r glanhau.
Ond credwch neu beidio – peth erchyll o gas
Os bydd yr hen erwn yn taflu ei flas.
Mewn twll sy’n ei waelod – rhoi cropyn eithinog
A’i ddal gyda’r “winfforch” yn dwt a sefydlog.
A chludo y dŵr yn ffres o’r ffynhonne,
Mae stwff y Bwrdd Dŵr mor llawn o gemege.
Nawr gwlychu y brag, ie wir, hanner winshin,
A dwr bron ar ferwi, fel bwyd tewhau mochyn.
A’i adael dros nos os oes gennych amser,
Ond cofiwch dim llai na phump awr a hanner.
Ac wedyn – saith galwyn o ddŵr bron ar ferwi
A’i adael e’n llonydd am awr i waelodi.
Ac yna ei ollwng i redeg drwy’r cropyn
Yn araf a thawel fel pe’n dod trwy welltyn.
Bydd hwn fod i edrych mor glir â’r un Bitter
(Ond peidiwch â phoeni am kilos na litre).
Nawr berwi y cwrw am awr berffaith gywir,
Ac wyth owns o hopys a phump pwys o siwgir.
Ond yn y cyfamser, nawr cliriwch y gerwrn,
A mas ar hen ’sweg’; i’r hwyed a’r twrcwn.
Nawr hidlo y cwrw yn lân ac yn daclus,
Roi nôl yn y gerwn (does diben i’r hopys)
Ei adael e bellach i oeri fydd raid
Nes bydd e o naws – tymheredd y gwaed.
Rhoi dwy lond llwy fwrdd o furum y dafarn
Nid burum y pobydd – neu sboeliwch y cyfan.
A’i adael am dridiau mewn cornel bach cynnes,
Ond peidiwch ä sgwlcan nawr Mishtar na Mistres.
A nawr rhaid ei hidlo heb lawer o ffwdlan
I jar neu foteli, a dyna y cyfan.
Ei gadw sydd orau am wythnos neu fis
Ond hyn sy’n dibynnu yn llwyr ar eich blys.
A byddwch yn garcus – da chi wrth ei yfed,
Cans andros o beth ydi colli eich trwydded.

Rachel Owen