Blog Dogfael» Siopau

Siop newydd yn agor yn Aberystwyth

Dogfael — Wed, 02 Sep 2009 20:36:51 +0000

Ddydd Sadwrn cafwyd agoriad swyddogol siop ddiweddaraf Aberystwyth, sef Poundland. Mae’n byw fel rhyw gyw gwcw yn hen adeilad Woolworth ac mae’n anodd dygymod gyda’r peth. Roedd y lle’n orlawn dros ŵyl y banc, a dim rhyfedd gan fod Sean Tully (Anthony Cotton) o Coronation Street wedi bod yno i’w hagor. Yr hyn wnes i ei werthfawrogi am y siop oedd yr ymdrech deg tuag at arwyddion dwyieithog, gan gynnwys “Waw / Wow”. Mae’n grêt byw mewn gwlad ddwyieithog, on’d yw hi?

Gyda llaw, roedd ‘na erthygl ddiddorol yn y Guardian am Poundland yn ystod wthynos yr eisteddfod genedlaethol.

Note: There is a rating embedded within this post, please visit this post to rate it.

Siop Spar, Llanwrtyd

Dogfael — Sat, 11 Jul 2009 09:50:24 +0000

Diolch yn fawr i gyfaill am y rhodd o’r llun trawiadol hwn o Siop Spar ddwyieithog yn Llanwrtyd, Powys.

Yr wythnos diwethaf fe fues hi heibio i bencadlys Spar ym Mhont-y-clun, ond ni lwyddais i dynnu llun. Bydd yn rhaid imi fynd yn ôl yno er mwyn tynnu’r lluniau.

Note: There is a rating embedded within this post, please visit this post to rate it.

Cau siop lyfrau Galloways

Dogfael — Sun, 29 Mar 2009 21:34:40 +0000

Rhaid dweud fod clywed am y bwriad i gau siop lyfrau Galloways yn Heol y Wig, Aberystwyth yn dod ag ychydig o dristwch i mi. Dwi’n gwybod fod y siop wedi bod yno am ryw ganrif, ond mae wedi bod yno ers i mi adnabod Aberystwyth. Pan ddeuthum i’r dref ddiwedd yr 1970au i astudio Cymraeg, Hanes Cymru a Drama roedd nifer go dda o fyfyrwyr yn dal i fod yn y dref. Roedd Ystafelloedd Cynnull yn dal i fod yn gartref i Undeb y Myfyrwyr ac yn darparu cinio a swper am bris gostyngol.

Roedd Galloways bryd hynny yn lle bywiog a phrysur. A’r drws nesaf safai siop lyfrau ail-law Galloways a oedd yn cael ei rhedeg gan ddyn serchog ond cwbl echreiddig, yn union fel y buasai dyn yn dychmygu rheolwr siop lyfrau ail-law. Dyna lle prynais i fy nghopi personol o Chwedlau Odo (golygwyd gan Ifor Williams, 1926). Ond yn raddol fe ddechreuodd mwy a mwy o fyfyrwyr gilio o’r dref, fe gaeodd y siop lyfrau ail-law ac fe aeth siop lyfrau Galloways ei hun yn dawel. Dwi’n cael yr argraff na wnaethon nhw ddygymod gyda’r newid oedd yn digwydd o’u cwmpas.

Bellach mae amser wedi dal i fyny gyda Galloways. Y cwestiwn mawr yw beth fydd yn digwydd nesaf wrth i’r adrannau gweinyddol y Brifysgol baratoi i symud o’r Hen Goleg i Gampws Penglais. A beth fydd effaith cau swyddfeydd Cyngor Sir Ceredigion a symud i Barc-y-llyn ar y dref? A fydd rhai o gaffis a bariau coffi y dref yn mynd yr un ffordd â Galloways?

Note: There is a rating embedded within this post, please visit this post to rate it.

Siopa yn Colruyt

Dogfael — Sat, 17 Jan 2009 13:51:42 +0000

2008-12-27
Nawr dwi’n siŵr fod llawer yn gweld mynd i archfarchnad a phrynu batris ar gyfer y camera fel rhywbeth y mae’n rhaid ei wneud. Ond i mi mae gwneud rhywbeth o’r fath yn eisin ar gacen gwyliau. Cyfle arall i dwyllo fy hun ac eraill fy mod yn Fflandrysyn o’r iawn ryw. Ac mewn sefyllfaoedd fel hyn y mae’r ffaith nad ydw i yn dod i’r amlwg. Sut hynny, onid yw archfarchnadoedd yn yr Undeb Ewropeaidd yn gweithio ac yn gwneud pethau yr un peth bobman. Ac mae hynny’n wir, heblaw am y pethau bach hynny lle mae pethau’n wahanol ac mae’n amhosib dyfalu beth sy’n digwydd.

Fe aethon ni i siop Colruyt ac fe wnaeth Liesbeth fy ngadael i chwilio am y batris yr oedd eu hangen arnaf tra’r oedd hi yn gwneud ei siopa ei hun. Roedden y batris i’w cael ger y tils. Des i o hyd i’r rhai yr oeddwn am eu prynu ac fe fues i’n gwylio’r tils am oesoedd i geisio deall yn iawn beth oedd yn digwydd. Roedd popeth yn debyg i’r arfer ar yr olwg gyntaf. Dod â’r nwyddau at y giât ac yna fe fyddai’r gweithiwr wrth y giât yn eu sganio. Ond wedyn roedd pethau’n wahanol. Doedd dim tils fel y cyfryw wrth y giât, roedden nhw y tu ôl iddi ac roedd yn rhaid mynd ymlaen i dalu. Wrth edrych yn ofalus fe welais i nad oedd neb yn talu gydag arian parod, ond yn hytrach yn defnyddio cerdyn o ryw fath. Ond nid cerdyn credyd arferol (fe ddysgais yn nes ymlaen fod Colruyt yn gweithredu sustem o fedru roi credyd ar eu cerdyn hwy eu hunain a bod hynny’n rhoi gostyngiad pellach i gwsmeriaid). Ychydig bach o banig, doedd gen i ddim cerdyn o’r fath. Ond yna fe welais i rywun yn tynnu arian allan o’i bwrs a’i ddefnyddio i dalu. O dyna ryddhad! Wedyn fe aeth popeth yn iawn ac fe wnes i brynu fy matris.

Cwmni o Fflandrys yw Colruyt ac mae’n llwyddiannus iawn yn cynnig nwyddau am brisiau cystadleuol iawn. Dywedodd fy ffrind eu bod hwy a Lidl yn dadlau’n gyson am bwy sy’n cynnig y fargen orau. Yn ddiddorol iawn roedd mwyafrif llethol y nwyddau ar silffoedd Colruyt yn nwyddau cynhyrchwyr eraill, yn hytrach na’u label hwy eu hunain, yn wahanol i Lidl.

Un o uchafbwyntiau’r gwyliau mae’n siŵr.

Note: There is a rating embedded within this post, please visit this post to rate it.

Rhestr o siopau Woolworths yng Nghymru

Dogfael — Fri, 12 Dec 2008 08:22:44 +0000

Bues i’n chwilio ar y rhyngrwyd am restr o siopau Woolworths yng Nghymru ond ni chefais un. Felly dyma ddarparu rhestr fy hun. Os yw un o ddarllenwyr Blog Dogfael yn sylwi ar gamgymeriad neu siop sydd heb ei chynnwys mae croeso iddynt roi gwybod i mi.

Aberdâr
Aberdaugleddau
Abergele
Aberhonddu
Abertawe
Aberteifi
Abertyleri
Aberystwyth
Bae Colwyn
Bangor
Bargod
Y Barri
Y Bermo
Caerdydd (Heol Albany)
Caerdydd (Heol Ddwyreiniol y Bontfaen)
Caerdydd (Stryd Clifton)
Caerffili
Caerfyrddin
Caergybi
Caernarfon
Cas-gwent
Casnewydd
Castell-nedd
Coed-duon
Conwy
Cwmbrân
Dinbych
Dinbych-y-pysgod
Doc Penfro
Y Drenewydd
Y Fenni
Y Fflint
Glyn Ebwy
Hwlffordd
Llandudno
Llanelli
Maes-teg
Merthyr Tudful
Penarth
Pen-y-bont ar Ogwr
Pontypridd
Port Talbot
Y Porth
Porthcawl
Porthmadog
Prestatyn
Pwllheli
Rhydaman
Y Rhyl
Shotton
Tonypandy
Y Trallwng
Tredegyr
Treffynnon
Treforys
Trefynwy
Wrecsam
Yr Wyddgrug

Note: There is a rating embedded within this post, please visit this post to rate it.