Hwyl fawr Facebook!

Dwi wedi troi fy nghefn ar Facebook. Roedd yn benderfyniad anodd, ond fe ddaeth yn hawdd yn y diwedd. Mae llawer o bethau i’w dweud o blaid Facebook; efallai taw’r peth mwyaf oedd y cyfle i gysylltu gyda rhywrai yr oeddwn i am gysylltu gyda hwy ac heb wneud ers blynyddoedd lawer. Ar y llaw arall roeddwn yn cael llond bol o’r holl negeseuon di-werth am yr holl ddigwyddiadau a grwpiau y gallwn i ymuno â hwy taswn i’n dewis. Dwi’n gwybod y gallwn i ddiffodd y pethau hynny, ond doeddwn i ddim wedi trafferthu gwneud. Y copsi ar fy negyddiaeth oedd yr holl ddadlau ynglŷn â phwy oedd berchen y data ar Facebook, gan gynnwys fy ffotograffau a’r wybodaeth amdanaf fi fel fy nyddiad geni. Fuodd hi ddim yn ddadl hir, ond roedd hi’n danbaid a phwysig, ac yn y diwedd fe enillodd yr ochr iawn, sef yr unigolion a oedd yn defnyddio Facebook, er mae’r pwnc yn parhau i fod yn agored i drafodaeth. Fe’m cythruddwyd i’r fath raddau fel bod hynny wedi fy ngyrru i gau fy nghyfrif. Wel nid cau mewn gwirionedd, (gan nad yw hi’n bosib ichi gau eich cyfrif!) ond ei ‘wyfyn-belu’ hyd nes i ddyn newid ei feddwl. Dwi ddim yn bwriadu gwneud hynny ar hyn o bryd, ond does dim ffordd i ddweud beth fydd yn digwydd yn y dyfodol.

(Dim pleidlais eto)

Rhannu hyn