Gwneud fy hun yn gartrefol

Pan mae dyn yn cyrraedd y gwesty mae e wastad yn cael ei siomi gan rywbeth neu’i gilydd. Doeddwn i ddim yn disgwyl moethusrwydd afradlon am nad oeddwn i’n talu am foethusrwydd afradlon. Ac ar y cyfan mae popeth yn ymddangos yn iawn. Ystafell fechan yw hi i un, ond fe wnaiff y tro – mae’r lle’n lân ac mae’r gwely’n gyfforddus. Maen nhw’n gweini brecwast rhwng 07.00 a 10.00.

Nid yw’n ymddangos y bydda i’n treulio llawer o amser yn y gwesty ta beth gan fod fy ffrind o Fflandrys, Liesbeth, wedi trefnu rhaglen lawn o weithgareddau ar fy nghyfer. Bore fory dwi’n mynd i Gent i’w chyfarfod hi, a dau o’i chyfeillion tu fas i orsaf Sint Pieters am 10.00. Bydd hynny’n meddwl gadael gorsaf Brwsel Zuid am ryw 09.00. Felly gwely cynnar amdani i fi heno.

Pan fues i ym Mrwsel fis Mai diwethaf fe wnes i aros mewn gwesty dafliad carreg i ffwrdd ar Ruppeplein a’r pryd ‘ny aethon ni i gael swper mewn tŷ bwyta pizza a phasta yn cael ei redeg gan bobl oedd yn dod yn wreiddiol o ogledd Affrica, Morocco os dwi’n cofio’n iawn. Wel, dyna lle es i am swper a chael gwledd. Fe ges i’r “symphonie” sef cymysgedd bastâu gwahanol.

(Dim pleidlais eto)

Rhannu hyn