Camera newydd

Digwyddodd rhywbeth ‘ofnadwy’ yn y gwasanaeth carolau brynhawn Sul. Bu farw fy nghamera. Roedd wedi bod yn rhoi rhyw awgrymiadau trwy’r wythnos flaenorol fod pethau ddim yn iawn. Wrth dynnu lluniau o addurno’r goeden Nadolig roedd pethau’n edrych yn ddu.

Fe aeth pethau’n waeth ddydd Sul. Er imi fedru tynnu rhai lluniau roedd yn rhaid imi ystumio a chwarae gyda’r camera (a chyfieithu ar yr un pryd!) er mwyn cael y peth i weithio. Doedd y ffwythiant tynnu llun ddim yn gweithio o gwbl, oni bai fy mod yn troi yn gyntaf at y ffwythiant fideo. Doedd dim byd yn ymddangos ar y sgrin o gwbl wrth geisio tynnu llun cyffredin. O diar! Roeddwn i’n teimlo’n sâl. Prynais i’r camera. Canon PowerShot A400, fis Ionawr 2005 ac ers hynny bum yn tynnu ffotograffau’n gyson, bron i 25,000 ohonynt i gyd – a’r cyfan bron i’w gweld ar fy nghyfrif flickr. Mae hynny’n golygu fy mod wedi tynnu rhyw 15 ffotograff y dydd ar gyfartaledd.

Roeddwn i’n gwybod yn iawn na allwn i fyw bellach heb gamera, ac felly nos Lun (ar ôl bod yn edrych ar y we nos Sul) fe es i siop Jessops yn Aberystwyth i chwilio am gamera. Roedd rhai pethau’n bwysig i mi:

• y gallu i ddefnyddio batris cyffredin (yn hytrach na rhai arbennig),
• camera yn gweithio’n weddol awtomatig ond yn caniatáu i rywun osod y peth a llaw hefyd,
• gallu defnyddio cardiau cof SD, a
• bod yn gweithio’n weddol debyg i fy nghamera oedd newydd farw.

Yr ateb wrth gwrs oedd cael camera arall gan Canon ac felly fe brynais i’r Canon PowerShot SX110 IS. Mae ganddo lawer o ychwanegolion nad ydynt ar yr hen gamera ac mae’n debyg y bydd hi’n cymryd tipyn o amser i ddod yn gyfarwydd ag ef, ond roedd e’n ddigon tebyg i’r hen gamera i mi ddechrau tynnu lluniau bron yn syth.

(Dim pleidlais eto)

Rhannu hyn