Blog Dogfael

Wedi’r cyfarfod o’r Cyngor Tref fe es i Ganolfan Morlan ar gyfer parti Nadolig Cymdeithas Staff Cristnogol Aberystwyth (CSCA). Dwi ddim wedi bod yn un o weithgareddau’r Gymdeithas o’r blaen ond gan fy mod i wedi rhoi sgwrs i’w haelodau ryw wythnos neu ddwy yn ôl ar drysorau Cristnogol y Llyfrgell Genedlaethol roeddwn i wedi cael gwahoddiad.

Doeddwn i ddim yn gwybod beth i’w ddisgwyl yn iawn, ond roedd hi’n noson ardderchog gyda gallu rhyfeddol Iesu Grist i ddwyn pobl mor wahanol at ei gilydd yn amlwg iawn. Mae’n rhaid imi gyfaddef imi anelu am y ford lle’r oedd y siaradwyr Cymraeg wedi crynhoi a chael cwmni da trwy’r nos. Yn ddiddorol iawn roeddwn i wedi cwrdd ag un o’r bobol ar y ford gyda fi o’r blaen rhyw 25 mlynedd yn ôl!

Cawsom bryd blasus o fwyd ac yn dilyn y cinio fe wnaeth Siôn Meredith siarad am bedwar o bobl oedd wedi bod yn ysbrydoliaeth iddo. Roedden nhw’n dod o Rwanda ac Uganda ac roedd e wedi’u cyfarfod yn ystod ei gyfnod fel rheolwr Tearfund yng Nghymru. Roedd e’n siarad am fod elw y noson yn mynd i waith Tearfund.

Wedi ein siaradwr cafwyd cyfnod o ganu carolau. Roedd rhywun wedi penderfynu taw carolau tan gannwyll oedd hi i fod, ond doedd y canhwyllau ddim yn ddigonol ac yn y pendraw roedd hi’n fwy tebyg i garolau tan dywyllwch! Dyma fideo ohonom yn canu’r garol Hark the herald angel sings yn y tywyllwch. Fe wnaeth pob un fwynhau dwi’n credu.

Rhagor o luniau o’r parti.

(Dim pleidlais eto)

Rhannu hyn