Emynwyr Aberystwyth

Drannoeth fy nghyflwyniad i ar Drysorau Cristnogol y Llyfrgell Genedlaethol roeddwn i mewn sgwrs arall, am Emynwyr Aberystwyth y tro hwn. Digwyddodd y sgwrs yn Eglwys y Santes Fair a’r un oedd yn traddodi oedd Delyth G Morgans. Ni allem ni fod wedi dod o hyd i neb gwell i wneud y gwaith hwn gan fod Delyth yn arbenigwr yn hanes ein hemynyddiaeth a’n hemyn donau.
Adlewyrchir ei gwybodaeth eang yn ei chyfrol Cydymaith i Ganeuon Ffydd.

Daeth tyrfa dda ynghyd i wrando ar sgwrs Delyth ac roedd hi’n defnyddio’r dechnoleg ddiweddaraf wrth gyflwyno. Roeddwn i’n edmygu ei harddull yn fawr gan roi geiriau a darluniau ynghyd i gyflwyno ei neges. Wedi’r sgwrs roedd cyfle i bawb gymdeithasu tros baned o de neu goffi.

Roedd y sgwrs yn ffordd o nodi dechrau yr ymgyrch i godi arian ar gyfer cywiro a glanhau organ Eglwys y Santes Fair. Dwi’n siŵr fy mod wedi sôn cyn hyn am yr organ sydd yn yr eglwys Mae’n organ hanesyddol ac o ddiddordeb i’r rhai sydd yn arbenigo ym maes hanes yr offeryn. Yr ydym yn ymwybodol ers rhyw flwyddyn y fod angen gwneud gwneud gwaith arno ac o’r diwedd mae’r amser wedi dod i weithredu. Ein gobaith bellach yw dechrau ar y gwaith ei hun wedi’r Pasg 2009. Ar hyn o bryd amcanir gorffen y gwaith o fewn 6 wythnos, ond does dim gwybod beth wnaiff yr adeiladwr organau ddod o hyd iddo wedi iddo ddatgymalu’r offeryn yn ei grynswth. Dim byd rhy ofnadwy gobeithio.

A diolch yn fawr iawn iti, Delyth.

(Dim pleidlais eto)

Rhannu hyn