Liesbeth yn Aberystwyth (3)

Roeddwn i wedi trefnu diwrnod o wyliau ar gyfer dydd Iau ac fe aeth y ddau ohonom i eglwys Llandadarn yn y bore. Doeddwn i ddim wedi bod yn yr arddangosfa yn yr eglwys ers sawl blwyddyn a doeddwn i ddim yn sylweddoli bod cymaint i’w weld a’i ddarllen yno. Mae gan Liesbeth ddiddordeb yn nhipyn o bopeth, ond fel gwyddonydd, rhaid dweud fod syniad y gynghanedd wedi ei chyffroi yn lân ac fe dreulion ni dipyn o amser yn dadansoddi’r gynghanedd yng nghywydd Dafydd ap Gwilym i Ferched Llanbadarn sydd yn rhan o’r arddangosfa.

Yn y prynhawn fe aeth Liesbeth i ymweld â Chyngor Llyfrau Cymru yng Nghastell Brychan ac â swyddfa newydd Cymdeithas yr Iaith Gymraeg yn y Cambria.

Roedd ein noson wedi ei threfnu ers sawl wythnos, oherwydd yr oeddwn wedi prynu tocynnau ar gyfer cyngerdd y grŵp Gwyddelig The Wolfe Tones yn y Clwb pêl-droed. Roedd hi’n gyfle gwych i Liesbeth brofi afiaith y bois o’r ynys werdd. Noson hwyliog dros ben.

(Dim pleidlais eto)

Rhannu hyn