Liesbeth yn Aberystwyth (1)

Mae wedi bod yn wythnos arbennig iawn oherwydd fod Liesbeth, fy ffrind o Fflandrys, wedi bod yn aros yn Aberystwyth ar ei gwyliau ers dydd Sul gan adael fore heddiw ar y trên i Gaerdydd. Fe wnes i gyfarfod gyda hi ryw dair blynedd yn ôl pan fues i am wyliau ym Mrwsel am dair wythnos dros y Nadolig. Ers hynny rydym wedi bod yn cysylltu gyda’n gilydd yn gyson. Dwi wedi bod ar wyliau ym Mrwsel a Fflandrys rhyw bedair neu bum gwaith ac fe ddaeth hi a’i chwaer a dau ffrind i’r Eisteddfod yn yr Wyddgrug llynedd.

Fel cenedlaetholwraig Fflandrysaidd mae ganddi ddiddordeb yng ngwleidyddiaeth Cymru ac yn y Gymraeg a’r diwylliant Cymraeg yn gyffredinol. Dwi’n falch o ddweud inni fedru cyfuno’r ddau beth a mwy yn ystod ei hymweliad. Nos Lun fe wnaeth rywbeth nad yw mwyafrif llethol trigolion Aberystwyth wedi’i wneud, sef dod i weld un o eisteddiadau Cyngor Tref Aberystwyth. Ac wedi’r cyfarfod fe gafodd gyfle i gwrdd a siarad gyda maer Aberystwyth, sef y Cyng. Sue Jones-Davies. Wedyn fe aeth Liesbeth a minnau i gyfarfod gydag RO am sgwrs a diod.

(Dim pleidlais eto)

Rhannu hyn