Diolchgarwch am y cynhaeaf 2008

Roedd y penwythnos diwethaf yn benwythnos Diolchgarwch am y Cynhaeaf yn Eglwys y Santes Fair. Dyma’r adeg o’r flwyddyn pan fyddwn yn neilltuo amser i ystyried haelioni Duw tuag atom ac i ddiolch iddo am hynny trwy fawl, addoliad a dathlu.

Dechreuodd y dathlu nos Sadwrn 11 Hydref gyda Swper Cynhaeaf yn Neuadd y plwyf. Roedd tîm o bobol wedi bod yn brysur yn cynllunio a pharatoi swper am yn agos i 80. Roedd hyn yn rhan o ddathlu haelioni Duw. Wedi’r swper cynhaliwyd cwis llawn hwyl ac fe wnaeth Siôn ddweud gair am waith Tearfund. Bydd yr arian a gesglir yn Eglwys y Santes Fair dros yr ŵyl yn mynd tuag at waith Tearfund gyda’i partneriaid yng ngorllewin Affrica.

Fore Sul, 12 Hydref, cynhaliwyd gwasanaeth y Cymun Bendigaid ar gyfer holl deulu’r eglwys gyda phlant a phobl ifainc yr Ysgol Sul yn cymryd rhan. Fe wnaethant hwy actio hanes Duw yn darparu bwyd i blant Israel yn yr anialwch wedi iddynt adael caethiwed yr Aifft pan wnaeth roi iddynt soflieir a manna i’w cynnal. Wedyn cafwyd anerchiad gan y Dr Dewi (Arwel) Hughes o Bontypridd, ymgynghorydd diwinyddol Tearfund. Ef hefyd oedd y pregethwr yng ngwasanaeth yr Hwyrol Weddi hefyd.

Rwyf wrthi yn darllen dau lyfr gan Dewi Hughes ar hyn o bryd. Mae newydd gyhoeddi llyfr newydd Power and poverty: divine and human rule in a world of need. Prif thema y llyfr yw sut y mae camddefnyddio grym yn arwain at ddioddefaint eraill yn y byd ac mae’n holi a ydyn ni’n rhan o’r camddefnydd hwnnw. Yr ail lyfr yw Castrating culture: a Christian perspective on ethnic identiy from the margins. Mae hwn yn llyfr arbennig o ddiddorol i Gymry gan taw enghraifft fawr y mae’n dychwelyd ati dro ar ôl tro yn y llyfr yw un Cymru, ac yn arbennig ei brofiad yntau. Un o’r pethau mae’n ei wneud yw adrodd sut y daeth yn un o arweinyddion yr ymgyrch dros addysg Gymraeg yn ardal Pontypridd yn y 1980au. Digwydd hyn i gyd yng nghyd-destun ymdriniaeth ddiwinyddol ar hunaniaeth ethnig.

Rhagor o luniau o’r swper cynhaeaf.

Rhagor o luniau o’r gwasanaeth fore Sul.

(Dim pleidlais eto)

Rhannu hyn