Blog Dogfael

Roedd fy niwrnod cyntaf yn Norwich bron â dod i ben. Yn awr yr oedd yn rhaid mynd yn ôl i St Stephen’s er mwyn cwrdd gyda RO a DML i gael swper ac yna mynd yn ôl i’r llety ym Mrhifysgol Dwyrain Anglia.

Roeddem wedi trefnu i gwrdd yn y caffi yn siop lyfrau Borders yng nghanolfan siopa Chapelfield. Daeth pawb ynghyd yn brydlon, ond roedd DML yn drymlwythog. Yr oedd ar ei wyliau ac wedi prynu dau lyfr yn gysylltiedig â’r Rhyfel Byd Cyntaf, un o’i ddiddordebau mawr. Y llyfr cyntaf oedd blodeugerdd o gerddi o’r rhyfel, The winter of the world, a olygwyd gan Dominic Hibberd a John Onions. Y llall oedd hanes y gwrthwynebwyr cydwybodol yn ystod yr un rhyfel, sef We will not fight… gan Will Elsworth-Jones. Yr oedd ei hapusrwydd o gael llyfrau oedd cymaint wrth ei fodd yn disgleirio o’i wyneb!

Wedi swper mewn bwyty Tsieineaidd aethom yn ôl i The Village ar y bws. Roeddwn i wedi blino’n lân gyda’r holl bensaernïaeth a’r hanes crefyddol ac fe es i gysgu fel mochyn ymhen dim amser. Roedd yn rhaid cael cwsg er mwyn bod yn barod ar gyfer ein taith i King’s Lynn yn y bore.