Blog Dogfael

Roedd ‘na un rheswm arall pwysig dros ymweld â Thetford. Er gwaethaf y ffaith fod y dref ddegau o filltiroedd o’r môr dyma Walmington-on-Sea y gyfres deledu comedi sefyllfa Dad’s army. O 1968 tan ganol y 1970au ffilmiwyd degau o rifynnau o’r gyfres boblogaidd yma. I nodi hyn, rhywbeth sy’n denu llawer mwy o ymwelwyr i’r dref na chofeb Tom Paine, mae’r bwrdd croeso lleol wedi cyhoeddi pamffled i alluogi twristiaid i ymweld â lleoliadau o gwmpas y dref lle ffilmiwyd y gyfres.

Bodlonodd y tri ohonom ni ar fynd i weld y Guidhall lle ffilmiwyd rhifyn yn 1972, ‘Time on my hands’, lle’r oedd peilot Almaenaidd yn hongian o’i barasiwt o dŵr cloc Neuadd y Dref yn Walmington. Yn y rhifyn gwelir y platŵn yn mynd i mewn i’r neuadd i ddringo’r tŵr er mwyn achub y peilot.

Yn anffodus ni chawsom gyfle i alw heibio i Nether Row yn Thetford lleoliad ffilmio ‘Man hunt’ yn 1969. Mae hon yn stori wych am Preifat Walker sydd wedi dod o hyd i barasiwt ac wedi ei droi yn ddwsin o nicers ond mae’n methu’n deg â chofio a yw’r nicers yn rhai gwynion neu hufen – golyga un lliw mae parasiwt Prydeinig oedd, y lliw arall taw parasiwt Almaenaidd oedd. Felly mae’n rhaid i Sarsiant Wilson, Capten Mainwaring a Walker fynd o ddrws i ddrws yn gofyn a yw gwraig y tŷ adref ac os yw hi am gael gweld ei nicers. Dwi’n chwerthin ond meddwl am yr olygfa nawr.

Gyda llaw i’r rhai sydd â diddordeb ffurfiwyd cymdeithas Dad’s Army Appreciation Society yn 1993 ac erbyn hyn mae ganddi dros 1500 o aelodau.

(Dim pleidlais eto)

Rhannu hyn