Blog Dogfael

Pan ddes i yn ôl i’r fflat roedd RO a DML yn ymbaratoi i ymadael, ac ar ôl cwpanaid o goffi bant â ni ar ein taith. Neu o leia dyna roedden ni’n ei fwriadu. Wrth edrych o ffenest y fflat, wrth ddisgyn ar hyd y grisiau, fe sylwais i fod un o olwynion car RO wedi’i chlampio. Panig, panig, panig!

Wedi cyrraedd y cerbyd gwelsom fod ‘na nodyn ar y car yn dweud am nad oedd gennym awdurdod i barcio yn The Village ein bod yn agored i gael ein clampio. Roedd y nodyn wedi’i amseru tua rhyw 9.30am. Erbyn 11.15am roedd y car wedi’i glampio ac roedd yn rhaid ffonio’r ddesg ddiogelwch er mwyn ein dad-glampio. Cymerodd hynny ryw hanner awr i gyd. (Dim dirwy i’w thalu diolch byth). Roedd y brifysgol ar fai gan fy mod i wedi holi wrth gofrestru a oedd angen gwneud trefniadau am barcio’r car a chael dim cyfarwyddyd clir o gwbwl am y peth.

Felly y peth cyntaf a wnaethon ni ar ôl dod yn rhydd oedd mynd yn ôl i’r swyddfa groesawu er mwyn cael ein trwydded parcio. Rhoddwyd honno i ni yn ddidrafferth ac rydyn ni’n gobeithio ein bod yn mynd i fod yn rhydd o’r fath anghyfleusterau weddill y gwyliau. Dyna un marc du i Brifysgol Dwyrain Anglia!

(1 yn pleidleisio, cyfartaledd: 5.00 allan o 5)

Rhannu hyn