Eisteddfod yn y ddinas yn y glaw 2008-08-05 (6)

Er gwaetha’r glaw mae ‘na un llygedyn o heulwen wedi tywynnu i mewn i’n bywydau yn Neuadd Buddug. Mae brwydr y sianel wedi’i hennill! Wedi inni ddychwelyd o borfeydd gwlyb Caerffili fe aeth RO ati i weld beth oedd ar y teledu, ac O ryfeddod! ar sianel 15 roedd S4C Digidiol yn ei holl ogoniant. Dwi’n teimlo braidd yn euog am hyn gan nad oeddwn i wedi bod yn rhan o’r frwydr o gwbl, na neb arall yn fflat B1. Yn hytrach na chreu ffws roeddem ni wedi bodloni ar wrando ar Tocyn wythnos gyda Beti George. Ond mae ‘na lot o bobol yr eisteddfod yn aros yn Neuadd Buddug a rhai ohonyn nhw yn bobol ddigon bolshi. Dwi’n cymryd taw un ohonyn nhw a fartsiodd lawr at y groesawfan a mynnu’r hawl i weld ei sianel ei hun yn ei wlad ei hun. A diolch byth am bobol felly. Oherwydd nawr rydyn ni’n medru gwrando ar Tocyn wythnos ar Radio Cymru a chwedyn edrych ar Bigion y dydd gyda Rhun ab Iorwerth ar S4C Digidol.

Rhagor o luniau o fy eisteddfod i 2008-08-05.

(4 yn pleidleisio, cyfartaledd: 4.00 allan o 5)

Rhannu hyn