Blog Dogfael

Beth ydych chi’n ei wneud pan ei bod yn bwrw glaw yng Nghaerdydd? Mynd i Gaerffili i weld a yw hi’n bwrw yno. Wel o leia dyna beth benderfynon ni ei wneud. Roeddwn i am weld Capel a Phlas Watfford ar gyrion Caerffili oherwydd ei gysylltiad gyda’r Methodistiaid cynnar. Ond doedd dim pall ar y glaw. Er inni deithio’n araf mewn tagfa draffig trwy ganol Caerdydd yn y glaw i gyrraedd Caerffili, roedd hi’n bwrw gormod i feddwl dod mas o’r car i edrych am y capel. Roedd yn dipyn o siom, ond wedyn roeddwn i yn y car ac yn gymharol sych o’m cymharu gyda’r trueiniaid oedd yn crwydro maes yr eisteddfod mae’n siŵr.

Mae glaw mewn amgylchiadau fel hyn yn medru bod yn dorcalonnus. Doedd gen i ddim byd pwysig yr oedd yn rhaid i’w wneud, ond roeddwn i wedi gobeithio cael golwg ar Gapel Watfford, ac yna efallai mynd heibio i Eglwys Llanwynno cyn mynd yn ôl i Neuadd Buddug. Ond doedd dim dewis amdani mewn gwirionedd ond mynd yn ôl i Neuadd Buddug, wedi inni brynu ychydig negeseuon ar gyfer swper.

Wrth ddod yn ôl yn gynnar roedd yn rhoi cyfle i wneud dau beth – gwrando ar seremoni Gwobr Goffa Daniel Owen a chymryd ychydig amser dros goginio swper.

Enillydd y Daniel Owen oedd Ifan Morgan Jones am ei nofel Igam ogam. Wrth glywed y Parchedig Harri Parri yn traddodi’r feirniadaeth roeddwn i’n gwybod nad deunydd darllen naturiol i mi oedd hon. Efallai imi gael fy magu ar ormod o D J Williams a Kate Roberts, ond dwi’n reit hoff o realaeth. Ar y llaw arall dwi ddim yn hoff iawn o ffantasi yn nhraddodiad Terry Pratchet a’i debyg, ond dyna beth yw’r nofel a enillodd. Dwi wedi gofyn i DML brynu copi i mi er mwyn medru dechrau ei darllen cyn gynted â phosib.

I swper roeddwn yn bwriadu coginio koftah, sef pelenni cig o’r dwyrain canol. Er taw gyda salad a bara y caiff y pelenni eu gweini fel arfer fe wnes i lybwr gyda chili a reis i fynd gyda nhw. Fel mae’n digwydd roedd hi’n llawer haws i wneud y pelenni nag yr oeddwn i’n ei ddisgwyl, ac roedd y pryd yn un blasus dros ben. A dwi’n gwybod taw fi sy’n dweud hynny, ond weithiau mae’n fy rhyfeddu i pa mor hawdd yw hi i ddilyn rysáit a chael y canlyniad a addawyd.

(2 yn pleidleisio, cyfartaledd: 5.00 allan o 5)

Rhannu hyn