Gwibdaith i’r Fro 2003-08-03 (7)

Wrth inni ddod mas o’r Old Swan Inn fe welson ni fod torf fechan wedi ymgasglu’r tu fas i Neuadd y Dref. Roedden nhw i gyd wedi’u gwisgo yn barchus ac yn eu plith rai yn cario baneri. Fel mae’n digwydd roeddem ni wedi dod i Lanilltud Fawr ar y dydd Sul pan roedd gwasanaeth sifig yn cael ei gynnal yn yr eglwys i nodi penodi maer newydd. Roedd pawb bron yn gwisgo cadwyn neu fedal neu’n cario baner. Roedd hi’n rhyfedd i weld y dorf yn ymgasglu a’r byd fel petai’n mynd heibio iddynt. Doedd neb yno yn gwylio’r hyn a oedd ar ddigwydd heblaw am ddau blismon a ni’n pedwar. Eto i gyd roedd y ddefod yn bwysig iawn i’r rhai oedd yn rhan o’r peth. Roedd y gwasanaeth yn dechrau am 3.00pm yn Eglwys Illtud Sant, ac felly am 2.50pm dyma’r dorf yn cychwyn am yr eglwys gyda’r rheithor a chrochlefwr y dref yn y blaen. Roedd hi’n union fel bod mewn rhyw dref fechan ar ganol tir mawr Ewrop gyda’r pwysigion i gyd yn eu hiwnifforms echreiddig. A dyna gofio’n sydyn iawn fod trigolion ynysoedd Prydain yn dwlu ar iwnifforms yn union yr un ffordd.

(Dim pleidlais eto)

Rhannu hyn