Gwibdaith i’r Fro 2008-08-03 (1)

Dwi’n siŵr y dylwn i fel eglwyswr da fod wedi bod yn y Pafiliwn ar y maes y bore ‘ma er mwyn gwrando ar bregeth Archesgob Cymru a’i apêl ar i’n gofal dros ein hunaniaeth Gymreig a’r Gymraeg beidio â gwneud ni yn bobol gul yn mynnu cau rhai allan nad ydyn ni’n credu eu bod nhw’n “Gymry go iawn”. Ond dwi’n ofni taw ar y radio y gwnes i wrando arno’n pregethu, yn gywir fel yr ydw i ers blynyddoedd, yn y car ar y ffordd i grwydro ychydig ar fro’r eisteddfod.

Rhaid cyfaddef ein bod ni wedi mynd ychydig tu hwnt i’r fro honno heddiw wrth inni droi ein golygon tuag at Fro Morgannwg a rhai o’r llefydd oedd yn gysylltiedig gydag Iolo Morganwg ei hun. DML oedd wedi sôn i ddechrau am ei ddymuniad i ymweld â Threfflemin, man geni Iolo. Cytunwyd felly ar hynny ac fe wnes i ymestyn ychydig ar y daith i gynnwys rhai llefydd eraill oedd â chysylltiad ag Iolo: Llan-fair, Sain Tathan a’r Bont-faen ei hun. Roedd hi’n fwriad hefyd i alw heibio i Lanilltud Fawr.

(Dim pleidlais eto)

Rhannu hyn