Gwleidyddiaeth ddiddorol Aberystwyth

Mae’n siŵr ddigon fod llygaid y byd ar ragetholiadau ac etholiad arlywyddol y Taleithiau Unedig, ond dylai rhywun gadw rhyw gilolwg ar yr hyn sy’n digwydd yn Aberystwyth? Wrth i’r byd gwleidyddol ddechrau paratoi am yr haf trwy dawelu ychydig ar ôl etholiadau’r cyngor sir ddechrau Mai mae’n ymddangos fod popeth yn digwydd yn y dref. Dechreuodd y cwbwl gydag ymddiswyddiad Eric Griffiths fel cynghorydd sir ward Rheidol oherwydd iddo gael ei arestio a derbyn rhybudd am drosedd rhyw gyda phlentyn o dan oed cysynio. Yn dilyn ei ymddiswyddiad fe bennwyd isetholiad ar gyfer 10 Gorffennaf ac felly fe aeth y pleidiau gwleidyddol ati i ddewis eu hymgeisyddion.

Plaid Cymru oedd y cyntaf; nos Iau diwethaf fe ddewison nhw y cynghorydd tref Aled Davies fel eu hymgeisydd hwy. Mae Aled yn frodor o Aberystwyth ac yn rheoli busnes yn y dref – bar Y Bae ar y Prom. Ddydd Sadwrn fe gyfarfu’r Lib Demiaid am ddiwrnod cyfan i ddewis eu hymgeisydd hwy ac yn rhyfedd iawn fe ddewison nhw fel ymgeisydd rhywun sy’n treulio’r rhan fwyaf o’r wythnos yn gweithio yn Llundain!

Ond dyw pethau ddim wedi aros yn llonydd ers hynny. Mae’r cynghorydd tref arall oedd yn ceisio am ymgeisyddiaeth y Lib Demiaid wedi cael ei siomi’n fawr gyda’r hyn a ddigwyddodd ac o’r herwydd mae hi wedi ymddiswyddo fel maer, cynghorydd tref ac fel aelod o blaid y Democratiaid Rhyddfrydol. Mae llun Lorrae Jones-Southgate ar dudalen flaen y Cambrian news heno o dan y pennawd ABER MAYOR QUITS AFTER ELECTION SNUB: Lorrae Jones-Southgate : no longer mayor, councillor or Liberal Democrat Party Member. Yn yr erthygl mae sôn ei bod hi wedi ysgrifennu llythyr chwerw tri thudalen i glerc Cyngor Tref Aberystwyth wrth ymddiswyddo a bod cyfarfod arbennig o’r cyngor tref yn cael ei gynnal nos Lun nesaf i drafod y mater.

Yn y cyfamser bydd yr ymgyrch yr isetholiad yn ward Rheidol yn mynd yn ei blaen. Bydd dewis da o ymgeiswyr yn ôl a ddeallaf i – Aled Davies dros Blaid Cymru, y Democratiaid Rhyddfrydol, Llafur, Annibynnol, a’r Ceidwadwyr os lwyddan nhw i ddod o hyd i ddeg o bobol i’w henwebu. Roedd gan y Ceidwadwyr gerbyd ar y Prom ddydd Sadwrn diwethaf yn annog unrhyw un o ward Rheidol i arwyddo papur enwebu eu hymgeisydd.

Felly mae’n ymddangos y bydd yn rhaid dewis ymgeisydd ar gyfer yr isetholiad cyngor tref cyn bo hir a pharatoi ar gyfer ail isetholiad o fewn ychydig wythnosau. Dwi’n rhoi’r bai am hyn i gyd ar y Dem Rhyddiaid!

(Dim pleidlais eto)

Rhannu hyn