Blog Dogfael

Wrth gwrs mae bywyd wedi mynd yn ei flaen, er gwaethaf gwleidydda. Roedd yr wythnos a aeth heibio yn eithaf prysur yn grefyddol. Nos Lun fe fues i mewn gwasanaeth i sefydlu ficer newydd yn Eglwys y Drindod, sy’n rhan o blwyf Aberystwyth. Cefais i’r fraint o ddarllen y darlleniad Cymraeg yn y gwasanaeth; eglwys lle cynhelir gwasanaethau Saesneg yw Eglwys y Drindod. Yr offeiriad oedd yn cael ei sefydlu oedd y Parchg Ian Girling a oedd wedi bod yn gurad ym mhlwyf Hubberston, ger Aberdaugleddau, Sir Benfro.

Roedd dydd Iau, dydd yr etholiad, hefyd yn ŵyl eglwysig bwysig, sef Dydd Iau’r Dyrchafael. Y noson honno, pan roedd pawb arall yn gwneud eu gorau glas i sicrhau fod eu cefnogwyr yn mynd mas i bleidleisio cyn bo’r gorsafoedd yn cau am 10.00pm, roeddwn i’n sicrhau fod Eglwys y Santes Fair yn agored a phopeth yn ei le ar gyfer gwasanaeth y Cymun Bendigaid. Roedd yn wasanaeth dwyieithog ar gyfer y plwyf i gyd, a’r pregethwr oedd Ian Girling. Sais yw Ian ac ni ddaeth ar draws llawer iawn o Gymraeg yn Hubberston, ond dwi’n gobeithio’n fawr iawn y bydd yn dysgu digon o Gymraeg i arwain gwasanaeth y Cymun Bendigaid cynnar yn Eglwys y Santes Fair yn y dyfodol.

(1 yn pleidleisio, cyfartaledd: 1.00 allan o 5)

Rhannu hyn