Llythyr gan y Post Brenhinol

Pan ddes i nôl adref o’r gwaith heddiw roedd ‘na lythyr oddi wrth y Post Brenhinol yn fy nisgwyl. Dwi ddim yn derbyn llythyron oddi wrth y Post Brenhinol felly roeddwn i’n eiddgar i wybod beth oedd ganddynt ddweud. Nid llythyr yn dymuno’n dda imi yn fy ymgyrch etholiadol oedd hwn, ond yn hytrach newyddion drwg iawn i drigolion Aberystwyth yn fy nhyb i. A beth oedd y newyddion? Mae’n fwriad gan y Post Brenhinol i gau swyddfa ddosbarthu Y Ffynnon Haearn a’i symud mas i Stad Ddiwydiannol Glanyrafon, Llanbadarn Fawr. Mewn geiriau eraill pan fydd llythyr neu barsel wedi’i anfon ata i a dyw hi ddim yn bosib ei ddosbarthu am ryw reswm neu’i gilydd – rhy fawr, angen llofnod, dim digon o stampiau, &c., &c. – bydd rhaid i rywun fynd mas i Lanbadarn Fawr, wel i’r stad ddiwydiannol Glanyrafon. Fel y mae ar hyn o bryd y mae’n bosib cerdded i’r swyddfa ddosbarthu yn ddidrafferth, ond nawr bydd hynny’n anodd iawn gwneud hynny a bydd hi ddim llawer haws dal bws yno. Dwi’n cymryd fod hynny’n wir am y rhelyw. Felly beth maen nhw’n ceisio ei wneud? Rhan o’r cynllun i gau swyddfeydd post mae’n siŵr. Bydd yn rhaid sôn am hyn ar y stryd pan yn ymgyrchu!

(1 yn pleidleisio, cyfartaledd: 1.00 allan o 5)

Rhannu hyn