Na i globaleiddio yn Aberystwyth!

Wel heddiw fe fues i mewn piced a phrotest tu fas i gaffi Costa Coffee yn Aberystwyth yn brwydro yn erbyn cyfalafiaeth ryngwladol a globaleiddio. Agorodd siop goffi Costa Coffee yn Stryd Fawr Aberystwyth heddiw. Roedd Cymdeithas yr Iaith Gymraeg wedi trefnu piced trwy’r tu fas i’r siop a phrotest gyda siaradwyr amser cinio. Es i ar gyfer y brotest. Mae tri pheth yn benodol yn fy nghythruddo am y siop – dim arwyddion Cymraeg, dim cynnyrch lleol, a dim caniatâd cynllunio. Yr olaf sydd wedi cythruddo caffis bach annibynnol y dref. Does gan Costa ddim caniatâd i agor caffi, dim ond siop cymryd i ffwrdd. Ond dydyn nhw’n poeni dim am hynny gan fod ganddyn nhw’r adnoddau i ymladd unrhyw benderfyniad gan adran gynllunio’r Cyngor Sir yn eu herbyn. Felly wrth i gaffis annibynnol y dref ufuddhau i benderfyniadau’r adran gynllunio, mae’n well gan Costa eu hanwybyddu. Aed y frwydr yn ei blaen!

Yr unig broblem bellach yw fy mod wedi hoelio fy lliwiau yn gadarn i’r mast a phetawn i’n cael fy nhemtio i fynd trwy ddrysau Costa Coffee unrhyw bryd yn y dyfodol buaswn yn agored i gael fy nghyhuddo o ragrith. Dim dewis bellach ond sticio gyda’r bois a’r merched lleol!

Rhagor o luniau o’r brotest tu fas i Costa Coffee, Aberystwyth.

(2 yn pleidleisio, cyfartaledd: 2.50 allan o 5)

Rhannu hyn