Blog Dogfael

Dwi’n gwybod nad oes dim byd yn fwy diflas na gwrando ar rywun sy’n falch o’u hunain yn clochdar eu llwyddiannau’n ddi-baid. Ond dwi’n ofni taw dyna dwi’n mynd i wneud. Dwi mor falch o fy llwyddiant technolegol dros y penwythnos fel fy mod i am i bawb glywed amdano. Mae gen i hen liniadur araf sy’n ymddangos yn fwy araf byth am fod un o sustemau gweithredu Microsoft Windows arno yn tagu’n gyson. Felly mewn ymgais i roi bywyd newydd yn y peiriant fe benderfynais lwytho un o fersiynau o’r sustem weithredu Linux arno yn lle Windows. Gan ei fod yn beiriant reit hen fe ddewisais i lwytho Xubuntu, fersiwn ysgafnach o’r enwog Ubuntu. Felly dyma lwytho’r cyfan i lawr o’r wefan, llosgi CD gyda’r feddalwedd a’i redeg ar y gliniadur. Fe wnes i arbrofi gyda rhedeg y feddalwedd o’r CD am ychydig oriau er mwyn ceisio dod yn gyfarwydd gyda’r sustem weithredu. Roedd hynny’n rhoi rhyw fath o syniad imi beth i’w ddisgwyl. Ond oherwydd fod y peiriant yn darllen yn gyson o’r CD roedd hynny braidd yn araf. Felly dyma benderfynu ei lwytho ar y peiriant ei hun. Penderfynais gael gwared o sustem Windows yn gyfan gwbl a dim ond byw gyda Xubuntu. Ar y tro cyntaf o’i lwytho cefais ychydig drafferth. Rhewodd y llwythiad gyda rhyw 10% i fynd. Dyma gychwyn y peiriant a dim byd yn digwydd! Anadlu’n ddwfn, peidio â phanicio. A dyma fi’n troi ati unwaith eto i lwytho’r feddalwedd. Aeth popeth yn iawn. Ailgychwyn y peiriant. Sgrin dywyll ddu. Aros. Aros. Ac yna’n sydyn dyma Xubuntu yn ymddangos, ac yn gweithio, ac yn medru tiwnio mewn i fy nghysylltiad di-wifr. Roeddwn i mor hapus fel dyma fi’n dawnsio rhyw jig fechan o gwmpas y gegin. Yna mynd ati i arbrofi i weld beth na allwn ei wneud gyda Linux. Dwi’n falch o ddweud taw ychydig iawn iawn o bethau yw’r ateb. Dwi’n dal i ddysgu, ond dwi’n dal yn falch iawn gyda’r canlyniadau hyd yn hyn. Cawn weld sut fydda i’n teimlo erbyn diwedd yr wythnos.

(3 yn pleidleisio, cyfartaledd: 5.00 allan o 5)

Rhannu hyn