Mwy am sylwadau

Diolch am dy sylwadau Garn, ac am dy sylw pryfoclyd Dafydd ar y cofnod Sylwadau ar sylwadau. Nadw, dwi ddim wedi darllen pob un llyfr sy’n gymwys ar gyfer gwobr Llyfr y Flwyddyn 2008. Ond dwi ddim yn credu nad yw hynny’n meddwl y galla i gredu fod un gyfrol yn deilwng o’r wobr ac y dylai ei hennill. Dyw hynny ddim yn golygu fy mod i’n meddwl nad oes ‘na gyfrolau eraill sy’n deilwng o’i hennill yn ogystal ag Wrth fy nagrau i. O edrych ar y rhestr ar wefan Academi mae’n ddigon posib fod ‘na nifer o gyfrolau ar y rhestr llyfrau cymwys sy’n deilwng o’r wobr. Boed i’r rhai sydd wedi’u darllen fynegi eu barn hwythau. Pan wnes i ddweud fy mod yn credu fod cyfrol Caryl Lewis Martha Jac a Sianco yn deilwng o Lyfr y Flwyddyn dwi ddim yn credu fy mod i wedi darllen hyd yn oed hanner y llyfrau cymwys ar gyfer y gystadleuaeth y flwyddyn honno chwaith. Nid gosodiad fforensig oedd fy nghred y dylai Wrth fy nagrau i ennill gwobr Llyfr y Flwyddyn, yn hytrach dull o fynegi fy mhrofiad i o ddarllen y nofel a’i chael yn ddarllenadwy, difyr, doniol a dwys, clyfar, a llawn dyfeisgarwch. Nawr dwi ddim yn teimlo fel ‘na ar ôl darllen pob nofel neu lyfr arall o bell ffordd; felly cyfrwng i fynegi hynny oedd dweud y dylai’r nofel ennill gwobr Llyfr y Flwyddyn.

I’r rhai sydd â diddordeb dyma’r llyfrau cymwys ar gyfer Gwobr 2008 dwi wedi’u darllen, wedi dechrau eu darllen ond heb eu gorffen, neu wedi ceisio eu darllen cyn rhoi’r gorau iddi ar ôl ychydig dudalennau.

• Tony Bianchi, Pryfeta, Y Lolfa
• Daniel Davies, Gwylliaid Glyndwr, Y Lolfa
• Dai Rees Davies, Y dwys a’r digri, Barddas
• Roy Davies, Coeliwch neu beidio : hunangofiant, Gwasg Gomer
• Twm Elias, Tro drwy’r tymhorau : almanac o wyliau a dathliadau’r flwyddyn, Gwasg Carreg Gwalch
• Cledwyn Fychan, Pwy oedd Rhys Gethin? : yr ymchwil am gadfridog Owain Glyndwr, Cym Lyfrau Ceredigion
• Arfon Gwilym, Cerddoriaeth y Cymry, Y Lolfa
• Ian Gwyn Hughes, Gweld Sêr: Pêl-droedwyr gorau Cymru o’r 60au hyd heddiw, Gwasg Gomer
• Jerry Hunter, I ddeffro ysbryd y wlad: Robert Everett a’r ymgyrch yn erbyn caethwasanaeth Americanaidd, Gwasg Carreg Gwalch
• Dylan Iorwerth, Gohebydd yng Ngheredigion yn ystod y flwyddyn fawr : hanes John Griffith (Y Gohebydd) ac etholiad 1868, Cymdeithas Lyfrau Ceredigion
• E. Wyn James, Glyndwr a gobaith cenedl, Cym Lyfrau Ceredigion
• David Jenkins, Ar lafar, ar goedd, Cymdeithas Lyfrau Ceredigion Gyf
• Gwyn Jenkins, Prif weinidog answyddogol Cymru: cofiant Huw T. Edwards, Y Lolfa
• Bethan Wyn Jones, Natur y flwyddyn, Gwasg Gomer
• Ceri Wyn Jones, Dauwynebog, Gwasg Gomer
• Jon Meirion Jones, Y llinyn arian, Cyhoeddiadau Barddas
• Llion Jones, Pethe achlysurol, Cyhoeddiadau Barddas
• Watcyn L. Jones, Cofio Capel Celyn, Y Lolfa
• Caryl Lewis, Y gemydd, Y Lolfa
• Iwan Llwyd, Hanner cant, Gwasg Taf
• Mihangel Morgan, Cestyll yn y cymylau, Y Lolfa
• Jenny Ogwen, Glaw a hindda, Gwasg Gomer
• Mary Annes Payne, Rhodd mam, Gwasg Gomer
• John Roberts, Yr helygen gam, Gwasg y Bwthyn
• Gwyn Thomas, Teyrnas y tywyllwch, Cyhoeddiadau Barddas
• Angharad Tomos, Wrth fy nagrau i, Gwasg Carreg Gwalch

(1 yn pleidleisio, cyfartaledd: 4.00 allan o 5)

Rhannu hyn