Kraainem (2)

Roedd y daith o Roodebeek hyd at Kraainem yn mynd â mi trwy gymuned cymharol gyfoethog Sint-Lambrechts-Woluwe, er roedd ‘na dai digon tlodaidd yr olwg i’w gweld o’r bws. Aethon ni heibio hefyd i gampws Université catholique de Louvain ym Mrwsel, sy’n bennaf yn gartref i ysbyty’r brifysgol, sef UCL St Luc. Ond wrth i’r bws wacau’n raddol roeddwn i’n dal i fod arni yn gadael Brwsel go iawn ac yn mynd trwy gymuned Sint-Stevens-Woluwe er mwyn cyrraedd Kraainem. Cefais fy ngadael yn safle Sint-Antonius, ond doedd hynny yn ddim ond un man ar ganol stad o dai ac yn raddol bu’n rhaid imi ddod i ddeall ble’n union yr oeddwn i a sut yr oeddwn i’n mynd i gyrraedd at neuadd cyngor Kraainem.

Gyda fy map de Rouck Groot Brussel – y map mwyaf hylaw sydd ar gael – yn fy llaw o fewn ychydig funudau roeddwn i’n cerdded i lawr Lijsterbessenbomenlaan tuag at gyfeiriad canol y dref. Roedd yr ardal hon yn gwneud i Ukkel ymddangos yn ‘goman’. Fel Wezembeek-Oppem, mae Kraainem yn un o gymunedau cyfoethocaf Gwlad Belg. Mae gwleidyddiaeth leol yn canolbwyntio ar iaith yma eto. Mae’r dref yn agos y maes awyr rhyngwladol, pencadlys NATO a’r sefydliadau Ewropeaidd, ac felly yn denu nifer o dramor i fyw yma. Y maer yw Arnold d’Oreye de Lantremange, un arall o’r rhai y gwrthododd gweinidog llywodraeth leol Fflandrys eu cadarnhau yn eu swydd oherwydd nad oeddent yn fodlon cadw at gyfreithiau ieithyddol y rhanbarth Mae’r ddadl honno yn parhau ar hyn o bryd.

Fel yn Wezembeek-Oppem y lle cyntaf imi ei weld go iawn oedd canolfan ddiwylliannol Iseldireg de Lijsterbes. Ond roedd gan y dref hon o 13,000 awyrgylch pentref.

(Dim pleidlais eto)

Rhannu hyn