Blog Dogfael

Mae’n ddiwedd y byd unwaith eto, ond wnes i ddim sylwi. Y rheswm dros hynny oedd fy mod wedi f’ynysu fy hun neithiwr oddi wrth y byd mawr mas fan ‘na oherwydd yr oeddwn i’n siŵr y byddai bod yn Gymro yn brofiad poenus unwaith eto. Roeddwn i wedi disgwyl gweld yr Almaen yn trechu Cymru yn Frankfurt a Lloegr yn gwneud eu ffordd yn gymharol hawdd (diolch i ddiofalwch Rwsia yn erbyn Israel) i rowndiau terfynol Euro 2008 yn erbyn Hrvatska (Croatia). Roeddwn i’n anghywir, wrth gwrs. Ond o’r herwydd fe wnes i golli pob munud o’r mwynhad oedd i’w gael o weld Cymru fach yn sefyll yn blwcaidd yn erbyn cryfder pêl-droed (cymharol) yr Almaen.

Collais hefyd y cyfle i weld ail-ddarllediad o ddiwedd y byd, sef Lloegr yn colli i Hrvatska ac yn gadael cystadleuaeth Euro 2008. Mae diwedd y byd yn dod heibio yn llawer rhy aml y dyddiau hyn. Fe ddaeth i Gymru yn ystod Cwpan y Byd Rygbi – neu o leiaf dyna oedd yr argraff o ddarllen y Western Mail a gwrando ar ddarllediadau BBC Cymru – ond mae Lloegr yn colli yn Wembley yn erbyn Hrvatska yn ddiwedd y byd ar raddfa lawer mwy. Mae’r BBC a phob cwmni darlledu arall Seisnig-Brydeinig ynghyd â’r papurau newyddion Llundeinig wedi bod yn dweud hynny wrtha i yn ddi-baid ers imi sylweddoli beth ddigwyddodd am ryw 10.15pm neithiwr. A dyna sy’n gwneud gwylio diwedd byd Lloegr yn gymaint o bleser; mae fel rhyw fath o ŵyl dymhorol sefydledig sy’n dod heibio’n gyson ac mae pawb yn chwarae eu rhan yn berffaith oherwydd eu bod nhw wedi cael cymaint o ymarfer erbyn hyn – dim ond y chwarae sy’n newid. A’r rhai sy’n niddanu’n fwy na dim yw’r newyddiadurwyr gyda’u dagrau gwneud parod a’r twpsod hynny sy’n fodlon llenwi amser darlledu trwy ffonio i mewn i ddweud eu barn nhw ar beth sydd wedi digwydd.

Ac yn goron ar y cyfan roedd hi’n bleser digymysg i ddarllen sylwadau Roy Keane:

My opinion, looking in on England from the outside, is that there are too many egos involved in the England set-up and that has cost them dear (ar wefan BBC Sport).

Mae’n siŵr ei fod ef yn adnabod ego pan mae ef yn ei gweld ac mae meddwl am glywed hynny ganddo ef ar yr adeg hon yn siŵr o fod yn dân ar groen pob cefnogwr pêl-droed o Sais. Diolch Roy am rwbio halen yn y briw roedd yn blasu’n hyfryd!

(Dim pleidlais eto)

Rhannu hyn