Y Lolfa yn hysbysebu’n Saesneg yn Y Cymro!

Rhaid imi gyfaddef nad oeddwn i wedi sylwi ar hyn nes i rywun dynnu fy sylw ato. Yn Y Cymro yr wythnos hon mae ‘na hysbyseb gan wasg y Lolfa ar gyfer un o’i llyfrau newydd ar y tudalen blaen, sef hunangofiant y darlledwr di-gymar Chris Needs, Like it is. Gwych o beth, mae e’n ddarlledwr talentog ac yn gymeriad arbennig a dylai ei hunangofiant fod yn werth ei ddarllen. Ond am ryw reswm rhyfedd mae’r Lolfa wedi dewis hysbysebu’r llyfr yn Saesneg ar dudalen blaen Y Cymro. Nawr dwi’n gwybod fod y llyfr ei hun yn Saesneg (gwaetha’r modd gan bod Chris yn siarad Cymraeg yn rhugl ac yn acen hyfryd Cwm Afan) ond mae hysbysebu’n Saesneg yn y Cymro yn mynd â’r peth ychydig yn rhy bell. Dim ond rhyw wythnos neu ddwy yn ôl roedd sefydlwyr a pherchnogion y cwmni hwnnw yn dathlu pen blwydd y wasg ar y teledu ac yn pwysleisio eu radicaliaeth a nodweddid yn bendant gan gylchgrawn Lol. Trueni na fuasai hwnnw’n dal o gwmpas i gofnodi sut mae’r mawrion wedi syrthio, ond dyna ni mae 40 mlynedd yn ddigon o amser hyd yn oed i radicaliaid y 1960au fagu ychydig o barchusrwydd a goddefgarwch tuag at ein ‘English friends’. Esiampl wych o sut i fyw mewn harmoni yn y Gymru gwbl ddwyieithog newydd.

(Dim pleidlais eto)

Rhannu hyn