Blog Dogfael

Dwi’n ysgrifennu’r blog heddiw o ystafell ddarllen y Llyfrgell Brydeinig yn Boston Spa, gogledd Lloegr. Y gwaith sydd wedi dod â fi yma, ond dwi’n rhydd am awr tra bod y sawl sy’n rhoi lifft ‘nôl i mi i Aberystwyth yn cael cyfarfod arall. Mae’r lle hwn yn rhyfeddol. Ar ganol ystad ddiwydiannol ar gyrion pentref yng nghefn gwlad Lloegr ceir un o lyfrgelloedd mwya’r wlad. O ran nifer defnyddwyr, heddiw mae’n gwneud i lyfrgell gyhoeddus fechan mewn pentref glan môr yng Ngheredigion ymddangos yn brysur. Ond efallai taw’r rheswm dros hynny yw ei bod hi wedi bwrw glaw yn ddi-baid ers imi gyrraedd yma neithiwr. Bore ‘ma wrth deithio o’r gwesty i’r llyfrgell roedd yn rhaid mynd trwy dau lif dŵr eithaf dwfn. Roedd y bysus yn ninas Efrog wedi rhoi’r gorau i deithio a dwi’n clywed fod y rheilffordd rhwng Birmingham a Wolverhampton o dan ddŵr hefyd. Dwi’n gallu dychmygu fy hun yn gofyn “Is this typical English weather?” i rywun cyn diwedd y dydd heddiw os na fydd hi wedi llacio rhyw ychydig. Mae yn fy nharo i’n fwy fwy fod Lloegr mor wahanol i Gymru a bod y gwahaniaethau yn tyfu. Wyddoch chi fod pobol yn cael ysmygu mewn bariau yn Lloegr a hynny heb deimlo unrhyw gywilydd am y peth o gwbwl! A dwi ddim wedi gweld glaw fel hyn ers blynyddoedd yn yr hen Walia wen. Mae llawer i’w ddweud dros ddatganoli.

Rhannu hyn