Fi a’r fferet o dan y Landsker

Ar un adeg roedd lluniau o’r awyr o’ch cartref yn beth ffasiynol iawn ac yn aml iawn buasai pobol yn eu danfon at ei gilydd fel cardiau cyfarch. Anfonwyd y llun hwn o fferm Middlepool, Pentywyn atom ni gan fy modryb, Anti Lil a’i gŵr, Wncwl George. Dwi’n credu ei fod yn dyddio o ganol y 1960au. Am ychydig flynyddoedd ddiwedd y 1960au buaswn i’n mynd i aros gyda fy modryb ym Middlepool am ryw wythnos yn ystod gwyliau’r haf. Roedd yn brofiad rhyfedd oherwydd roedd Middlepool o dan y Landsker (yn Sir Gaerfyrddin) a Saesneg siaradai pawb yno, heblaw am fy Anti Lil. Dwi’n cofio’r gwyliau hynny nawr gyda lot fawr o hiraeth. Doedd neb fel petaen nhw’n poeni rhyw lawer beth roeddwn i’n ei wneud. Roedd gan Lil a George ddau fab, Huw ac Alan, ac fu fusen i’n mynd gyda’m cefnderwyr i lawr i’r traeth ym Mhentywyn. Roedd hynny yn y dyddiau cyn i dwristiaeth droi yn ddiwydiant, ond roedd yn bodoli ond fel rhyw weithgaredd amaturaidd braidd. Ym Middlepool y cefais un o brofiadau anhapusaf fy mywyd pan gefais fy nghnoi gan fferet. Roedd y fferet yn gwrthod gadael mynd ac yn y diwedd bu’n rhaid i Wncwl George ei bwrw yn galed iawn. Doedd yr holl beth ddim yn neis. Am ryw reswm wedi hynny ddigwydd es i byth ‘nôl i Middlepool i dreulio wythnos yn yr haf. Wrth imi adrodd yr hanes nawr dwi’n sylweddoli ei fod yn swnio’n debyg i’r fath o beth yr oedd Dylan Thomas yn ei wneud!

Rhannu hyn