Etholiad 2007 (8)

Nawr ‘te, mae pethau’n dechrau mynd yn ddiddorol. Gyda’r canlyniad pwysicaf allan o’r ffordd, mae’n gyfle i edrych o gwmpas ar beth sy’n digwydd mewn mannau eraill. Y peth cyntaf dwi’n sylwi arno yw pa mor anodd yw hi i swyddogion canlyniadau reoli gwybodaeth am yr hyn sy’n digwydd yn y gwahanol ganolfannau cyfri. Roedd adeg cyn ffonau symudol, rhyngrwyd diwifr a phob gadjet arall lle’r oedd hi’n bosib i’r swyddog canlyniadau selio canolfan gyfrif hyd nes ei fod ef (a dyn oedd e fel arfer) yn gweithredu ei hawl i gyhoeddi’r canlyniad. Byddai’r cyhoeddiad ei hun yn cael ei wneud mewn iaith ffug-gyfreithiol ac yn y fath fodd fel nad oedd hi’n bosib i’r rhai oedd yn gwrando wybod dros ba blaid yr oedd pob ymgeisydd yn sefyll, yn hytrach roedd yr etholiad yn rhyw fath o gêm ar gyfer boneddigion fel criced. Dim ond yn yr ychydig funudau diwethaf y daeth canlyniad go iawn i’r golwg, ond rydyn ni wedi bod yn gwrando ar arbenigwyr a gwleidyddion yn trafod ‘canlyniadau’ yr etholiad ers dwy awr a mwy.

Rhannu hyn