Mwy o erlid ar Gwrdiaid Twrci

Newydd ddarllen stori ar wefan newyddion y BBC am erlyn arweinwyr Plaid y Gymdeithas Ddemocrataidd (Demokratik Toplum Partisi, DTP) yn Nhwrci. Plaid Gwrdaidd yw’r DTP i bob pwrpas ac mae un o’i harweinwyr, Ahmet Turk, wedi’i ddedfrydu i chwe mis o garchar am alw’r arweinydd trefysgol Abdullach Ocalan yn “Mr Ocalan”. Yr wythnos diwethaf cafodd yntau ac un arall o arweinwyr y blaid, Aysel Tuğluk, eu dedfrydu i ddeunaw mis o garchar am ddosbarthu llenyddiaeth wleidyddol mewn Cwrdeg ar Dydd Rhyngwladol y Menywod 2006. Yn Nhwrci nid oes hawl dosbarthu llenyddiaeth wleidyddol ond mewn Twrceg. Cyn iddynt gael eu carcharu bydd yn rhaid i lys uwch gadarnahu eu dedfryd. Mae hyn i gyd yn digwydd wrth i’r cyn-arlywydd Kenan Evren awgrymu bod angen i Dwrci drawsnewid o fod yn wladwriaeth ganoledig i fod yn ffederasiwn, awgrym sydd wedi ennyn llid cenedlaetholwyr Twrcaidd. Mae rhai yn awgrymu bod gwneud awgrym o’r fath yn arwydd o salwch meddyliol ar ei ran.

Aysel Tuğluk yn annerch cyfarfod o blaid y DTP.

Rhannu hyn