Dim eira hyd yn hyn

Ar ôl holl addewidion y rhai sy’n darogan y tywydd am eira heddiw mae’n rhaid imi gyfaddef taw’r peth cyntaf wnes wedi dihuno am 5.45am oedd ‘neidio’ mas o’r gwely (neu’r dynwarediad gorau y gallaf i ei wneud o ‘neidio’) er mwyn edrych i weld faint o drwch o eira oedd ar lawr. O fy siom! Dim eira o gwbwl. Dwi’n dal i edrych drwy’r ffenest wrth imi ysgrifennu hyn o flog, a dwi’n dal i ddisgwyl i weld un plufyn. Ond dwi’n byw mewn gobaith, oherwydd pan ddaw eira fe ddaw yn sydyn ac o fewn llai nag awr fel all y lle fod yn wyn. Er taw dim ond drwg yw eira mewn gwirionedd o ran diogelwch a anhwylustod, eto mae ei allu i barluso gwlad gyfan dros nos yn ein hatgoffa ni nad ydyn ni’n rheoli popeth eto. Mae angen ein hatgoffa o hynny’n eithaf aml y dyddiau hyn. ‘Ta beth, mae’n bosib y gwelwn ni ychydig o’r sdwff gwyn cyn diwedd y bore.

Rhannu hyn