Brwsel, 2006-12-23

Wedi crwydro o gwmpas Leuven trwy’r dydd roeddwn i wedi blino’n lân, ond ddim gormod i fynd yn ôl i’r Grote markt ym Mrwsel er mwyn profi’r arddangosfa sain a goleuni ar gyfer y Nadolig wedi’i threfnu gan Gyngor y ddinas mewn cydweithrediad â chwmni trydan cenedlaethol Gwlad Belg, Electabel. Dwi ddim yn gwybod beth yw e, ond maen rhyfedd sut mae rhywbeth cwbl gyffredin fel ychydig bach o sŵn a golau gwahanol liw yn medru hudo hyd yn oed oedolion calon-galed. Ac fe ges i fy hudo gan hyn i gyd hyd i mi ddechrau dadansoddi beth oedd yn digwydd. Roedd ‘na garw yn carlamu dros adeiladau’r Grote markt ac yna fel petai bodau all-fydol yn ceisio dod i gyswllt â’r ddynoliaeth. Roedd ‘na filoedd yno yn gwrando ac yn gwylio, felly mae’n dda gwybod fod ‘na eraill sydd yr un mor sentimental â mi ym Mrwsel.

Rhannu hyn