Siop Lyfrau Iseldireg, 2006-12-22

Fe wnes i deithio o orsaf metro Sint Guido hyd at orsaf De Broukère yn y canol. Ar y ffordd yr oeddem yn mynd trwy orsaf wedi’i henwi ar ôl un o blant enwocaf Brwsel sef y canwr Jaques Brel. Yn bellach i lawr y lein o Sint Guido ceir grosaf wedi’i henwi ar ôl y beiciwr enwog Eddy Merkx. Wedi cyrraedd y canol dyma gerdded o’r orsaf i Muntplein. Yno roeddwn i’n cofio bod ‘na siop lyfrau Iseldireg ac roeddwn i’n chwilio am eiriadur a phapur newydd er mwyn ymarfer. Digwyddais i gyrraedd y siop bron ar amser cinio ac o fewn ychydig funudau roedd y siop dan ei sang. Maen nhw’n dweud taw amser cinio yw’r amser prysuraf mewn siopau llyfrau Iseldireg ym Mrwsel am fod cymaint o siaradwyr Iseldireg yn dod i mewn i’r ddinas i weithio yn ystod y dydd, ond yn gadael bob nos i fynd adref i Fflandrys ‘go iawn’ i dreulio’r nos. Felly yn ystod y dydd mae llawer o Iseldireg i’w chlywed ar y strydoedd oherwydd eu bod yn dod i weithio yn swyddfeydd Llywodraeth Cymuned Fflandrys sydd yn y ddinas.

Cefais i fy ngeiriadur a’m cylchgrawn, ond roedd yn rhaid imi ymuno â chwt oedd yn mynd yr holl ffordd o gwmpas y siop er mwyn talu. Gyda’r Nadolig yn dod roedd llawer yn prynu anrhegion ac roedd yn siop yn cynnig gwasanaeth lapio. Roedd y siop yn llawn llyfrau Iseldireg, gydag ychydig o rai Saesneg. Ar y llawr gwaelod ceid cylchgronau, dvd’au, llyfrau plant, llyfrau coginio, gosod blodau, iechyd, a DIY. Ar y llawr cyntaf ffuglen, barddoniaeth, hanes, taith a mapiau. Ar yr ail lawr llyfrau ar gyfer ysgol a choleg, ieithoedd, seicoleg, cyfrifiaduron, cyfraith a chrefydd. Beth oedd yn ddiddorol i mi oedd er bod y llyfrau mewn Iseldireg roedd nifer fawr iawn ohonynt yn gyfieithiadau neu addasiadau o Saesneg. Er enghraifft roedd llyfrau Dan Brown yn amlwg iawn yn yr adran ffuglen, ac yn yr adran goginio roedd Jamie Oliver yn frenin. Mor debyg ac eto mor wahanol.

Rhannu hyn