Eisteddfod – Dydd Sadwrn 12 Awst 2006 (2)

Pam coginio?

Mae rhywun yn siŵr o ofyn pam fy mod yn fodlon treulio mwy o amser yn coginio yn yr eisteddfod nag ydw i ar y maes ei hun. Wel y gwir amdani yw fy mod yn mwynhau coginio, ond wrth goginio i fi fy hun dwi ddim yn cael y pleser o weld rhywun arall yn gwerthfawrogi’r ymdrech. Ond pan fo pobol yn gwerthfawrogi’r gwaith a’r ymdrech mae’r cyfan yn bleser. Weithiau dwi’n meddwl fy mod wedi fy ngeni yn y lle anghywir gyda’r rhyw anghywir ac mewn gwirionedd rydw i’n wraig tŷ Eidalaidd o fewn i gorff dyn o Gymro. Dylwn fod ar fferm yn Umbria yn creu miraglau bychain allan o basta a chaws ac olew’r olewydd i weini i’r bois wedi iddyn nhw ddod mewn o’r perci yn cywain gwair. Neu weithiau dwi’n meddwl fy mod yn rheolwraig tŷ bwyta o Beirut wedi’i chaethiwo o fewn i gorff llyfrgellydd o Aberystwyth.

Ond pan ddaw’r eisteddfod heibio dwi’n teimlo fy mod yn cael fy rhyddhau i fod yr hon ydwyf mewn gwirionedd a dyna pam dwi’n mynd i’r eisteddfod bob blwyddyn, er mwyn cadw cyswllt gyda’r ochr hynny i fy mhersonoliaeth. Rydw i’n mynd i’r eisteddfod er mwyn bod yn fam i DJP, DML, RO a phwy bynnag arall sy’n digwydd bod o gwmpas!

Rhannu hyn