Blog Dogfael

Roedd bore dydd Sul yn wers am beryglon enwadaeth. Dwi’n teimlo’n cywilydd wrth adrodd yr hanes nawr, ond fel eglwyswr da, roeddwn i wedi bwriadu mynd i wasanaeth yn Eglwys Esgobol yr Alban y bore ‘ny. Ond nid oes cymaint â hynny o eglwysi esgobol yn Glasgow. Felly, cyn mynd roeddwn wedi edrych ar wefan Esgobaeth Unedig Glasgow a Galloway ac wedi gweld taw Eglwys St. Silas, Woodlands oedd yr ‘agosaf’. Roeddwn i wedi cymryd map gyda fi i ddangos y ffordd i’r lle. Felly bant â fi ar fy nhaith gan fynd heibio i nifer o eglwysi eraill (Eglwys yr Alban, Eglwys Rydd yr Alban, Bedyddwyr) roeddwn i’n bedant fy mod yn mynd i ddod o hyd i eglwys esgobol. Ond aflwyddiannus fu’r ymdrech – wedi cerdded am ryw ugain munud roedd hi’n ymddangos ‘mod i wedi cyrraedd rhyw hanner ffordd. Yn y diwedd dyma droi am ‘nôl mewn anobaith. Fe ddylswn i fod wedi mynd i chwilio amdani’r noson cynt i weld pa mor bell oedd hi mewn gwirionedd o’r gwesty (mae mapiau yn medru bod mor dwyllodrus!) neu’n hytrach fe ddylwn i fod wedi bod yn ddigon ecwmenaidd i alw mewn yn un o’r eglwysi eraill. Rwyf wedi dysgu fy ngwers bellach.

Rhannu hyn