Mwy o newyddion na’r arfer?

Dwi ar fy ngwyliau heddiw fel ddoe ac mae’n ymddangos i mi bod mwy o bethau’n digwydd pan ych chi ar eich gwyliau. Wel, dyna fy nghanfyddiad i o ddarllen y Western mail heddiw. Fel arfer fy nghŵyn i yw nad oes digon o newyddion ynddo – lifestyle, nes eich bod wedi cael llond bol o dai ac addurno a DIY a coginio a iechyd a … ond dim newyddon caled – a dyna yw’r condemniad mwyaf ar y papur sy’n glaw ei hun yn bapur “cenedlaethol” ond yn cael ei ddarllen gan ychydig ddegau o filoedd yn unig. Ond heddiw roedd rygbi (parti priodas Duncan Jones) yn gorfod rhannu’r ddalen flaen gyda stori am afreoleidd-dra mewn pleidleiso ym Mhen-y-bont ar Ogwr a marwolaeth milwr o Gymro ar ôl cael ei gosbi am gam-ymddwyn.

Y tu fewn wedyn mae ‘na stori am Trish Law yn cymryd ei lle yn y Cynulliad Cenedlaethol, lle bydd hi’n eistedd rhwng John Marek a Jocelyn Davies. Wrth ddod yn aelod o’r Cynulliad mae mwyafrif yr aelodau’n fenwyod, a hynny am y tro cyntaf mewn unrhyw sefydliad ’senedd-debyg’ (buasai’n ffolineb ei alw’n senedd go iawn) yn y byd. Mae’r Western mail yn mynd i dref ar hyn; dyna’r fath o beth fyddan nhw’n ei roi yn ei rhestr nesaf o bethau i fod yn falch ohonynt am Gymru – Stadiwm y Mileniwm, Canolfan Mileniwm Cymru, Shirley Bassey, Tom Jones, a mwy o fenwyod yn ein ’senedd’ nag unrhyw wlad yn y byd! Grêt i fod yn Gymro neu’n Gymraes!

Mae cael y Western mail yn ddiddorol yn poeni ychydig arna i. Efallai y dylwn geisio mynd mas yn fwy aml; efallai buasai ymuno â chôr yn syniad, neu ysgrifennu nofel.

Rhannu hyn